Byenvini Sou Sit Pa'w la
Kisa ki Betay Lakay:
Betay (ki vle di bèt jaden) se yon òganizasyon de baz ki gen pou misyon ede amelyore agrikilti an Ayiti (Lakay). Betay Lakay ap travay men nan men ak kiltivatè yo pou ede yo reyalize plis potansyèl nan bèt y'ap gade yo. Nou konbine teknik 21yèm syèk ak abilite natirèl kiltivatè yo pou rezilta maksimòm, pandan n'ap kenbe bèt yo fre e òganik. Pou nou men'm, pratik pwodiksyon òganik la, se sèl chwa pwodiktè bèt genyen pou grandi epi van'n bèt ki gen bon jan kalite pandan y'ap pwodwi vyann ki pa pral lakòz vye maladi, oswa entèfere ak pwosesis natirèl kwasans kretyen vivan. Ki donk kèlkeswa difikilte, epi gen anpil difikilte, men rekonpans ki genyen nan pratik elvaj bèt òganik yo tou senpleman twò enpòtan pou nou inyore.
Sa vle di ke tout zannimo ke nou grandi oswa vann pase anba yon sistèm jesyon òganik ki trè strik. Ki vle di, bèt nou yo grandi nan bon kondisyon, yo jwen'n ase kote 
pou yo kouri epi yo manje bon manje ki pwodwi e rekòlte de fason òganik sèlman. Sa vle di tou, bèt òganik nou yo jwenn kondisyon ki akomode konpòtman natirèl ak sante tout bèt vivan. Kondisyon sa yo ekzije aksè deyò, lonbraj , abri, lè fre, limyè solèy dirèk ki apwopriye pou chak espès bèt, ak aksè nan patiraj pou zannimo ki manje zèb yo. Nou pa janm bay bèt nou yo òmòn ni lòt kalite dwòg pou fè yo grandi vit; nou tou senpleman bay la nati lè pou'l fè travay li.
Filozofi Nou:
Trete kiltivatè yo ak respè e diyite, respèkte kliyan nou yo epi reponn a bezwen yo san pèdi tan, bay yon pwodwi ki wo nan kalite men ki ba nan pri; kreye yon sitiyasyon kote nou tout soti ganyan.
Misyon Nou:
Pou amelyore agrikilti an Ayiti , konsa kiltivatè yo va jwenn pi bon ankourajman pou yo rete andeyò pou kiltive tè olye pou yo kouri rantre nan vil yo. Nou vle ede fè agrikilti fre ankò.